Mujhe political science nahi aati

Mujhe political science nahi aati. Mujhe nahi pata ki lok-sabha me log kya karte hain aur rajya sabha me kya karte hain. Mujhe nahi pata har saal election kyun hote hain. Mujhe nahi pata mere desh me kitni political party hain. Mujhe nahi pata mere desh ke pradhaanmantri kaunsi political party ke sadasya hain. Kyun mera desh ‘Valentine day’ k din kisi gareeb ki dukaan k sheeshe todta hai ? kyun mera desh bhooke gareeb insaan ko lekar Anshan par baithta hai? kyun mera desh pareshaan ho jaata hai jab Amitabh chheenkta hai ? Kyun mera desh sadak pe pade bimaar insaan ko nahi dekhta ? Kyun nahi dekhte ki lakhon log sadak pe bheek maang rahe hain? Kyun nahi dekhte ki jis restaurant me tum Rs 20/- tip waiter ko dekar aaye ho, wahin ek nanhi jaan tumhaari plate saaf kar rahi hai. Kyun nahi dekhte ki ek gareeb boot polish karke apni roji-roti chala raha hai. Kyun nahi dekhte ki log thand me sikudkar sadak pe hi dum tod dete hain. Kyun nahi dekhte ki jo kisaan tumhaare liye basmati chaawal ugaa raha hai, uske bacchon ko 3 waqt ki roti naseeb nahi ho rahi. Hume parwaah hai Amitabh ki khaansi ki, ramdev ke blod pressure ki. Hum Z security dete hain unko jo khud kisi ko maarkar aaye hain. Hum padhe likhe vote dete hain unko jinhe sign tak nahi karna aata. Kya kabhi socha hai ki aaj bhi hamare desh me kitna paisa hai. Swiss account ko chhod de, fir bhi itni poonji hai, desh sone ki nahi par chandi ki chidiya jaroor ban jaaye. Nange ko kapde mil jaaye. Bhooke ko khaana mil jaaye. Pyaase ko paani mil jaaye aur beghar ko chhat mil jaaye. Crore-ron rupaiyen kharch ho jaate hain rally-yon me. Election se pehle rally. Election k baad rally. Kuch pasand naa aaye to fir morcha ya rally. Galti se kisi mantri ko ribbon kaatne bula lo, jitna paisa unpe kharch ho jaata hai, utne me 4 bacchon ko school me daakhila mil jaaye. Ganesh Utsav me mantriyon aur unki party ke sadasyon ke bade bade poster lage hote hain. Agar is painting ka kharcha kisi sarkaari school ki haalat theek karne me lagayi jaaye to bacchon ko bhi padhne me mazaa aaye. Agar CM sahib PM sahib se webcam se meeting karlen aur savings kisaan ki madat me lagayen, to shayad aur acchi fasal desh banaa paaye. Mantri sahib ke ghar pe bhi sirf 16 ghante bijli di jaaye to bijli khapat aur kam ho jaaye. Unki home minister sahiba agar hamari tarah bus-rickshaw se sabji lene jaayen, to petrol ki keematen shayad har mahine naa badhayi jaayen. Mantriji agar sarkaari naukar ke naam pe discounts lena bandh kar den to hamare gharon ke budget sudharjaayen. Sadkon pe haathi ghodon ke pathar ki jagah agar kuch ped lagwa de, to mantri ji pe kuch vishwaas aa jaaye. Ye list to chalte jaayegi……thode mantri ji sudhar jaayen aur thode hum bhi. Aane waali peedhi ko ek well developing nation mil jaaye…. Mujhe political science nahi aati. Mujhe to bas itna pata hai Mantri ek public servant hai, Humne use desh ki seva karne ke liye banaya hai, Fir bhi wo public se hi seva karwaata hai!! Is desh ka aadmi use sir pe bitha sakta hai, Fir bhi wo sirf kursi ke peeche hi kyun bhaagta hai, kyun bhaagta hai, kyun bhaagta hai?

Priyanka Goel